بلّشت الإنفلونزا

و كاسات الليمون والبابونج و الزعتر مرمَية وين مكان و صحون الشوربة رايحة جاي و دهون المنتول هو وقلته صار واحد و الأسبيرين و الريفانين و الفيتامين سي بالجرَار و برضه لا حياة لمن تنادي!

مصرّة (القحة، الأحَة، الكُحة)" كل واحد يختار اللي بناسيوا" إنها تضل ملزقة فيكم.

الشعور الأجمل إنوا تتزكروا إنكم لازم تنزلوا عالشغل و بسيطة بدون ما تمشطوا شعركم بتتحججوا بالناتشورال لوك هاليومين و كل الفولدرات بالكمبيوتِر معفشكة أكتر من خزانة الأواعي آخر الشتوية و عيونكم شايفة الفولدر كاسة ليمون و أبو سامر صاحب المجمّع الله يهديه كل شوي بطفي التدفأة على اعتبار إنه الشمس معبية المكتب!

وبعدين بيجيكم تلفون من شركة الشحن العبقرية اللي بتقولكم إنه إلكم طرد و بدكم تدفعوا جمارك عليه لتستلموا، طب يا عمي يهديك يرضيك هدا الطرد مو تجارة و لا سبير بارتس هدا أجندات للسنة الجديدة ليه بدكم تدفعونا، عادي، الجواب إنه لو إنهم كتب ما بندفعكم بس لإنهم شبه دعاية بدكم تدفعوا، حد يقوللي كتير فرقت؟لأ و بتسألو عن الكلفة بقولولك ما بنعرف طب أراوند قديش يعني بناء عخبرتكم بقولولك ما عنّ خبرة بهالمجال! كل اللي بعرفوا إنه تنستلم الأجندة الملوكية لازم تقدموا تفويض مصدق من البنك و الرقم الضريبي و تشوفولكم مخلّص زكي متلهم! نسيت أسأله إنه شو عرفهم شو في في الطرد مع إنه على حد علمي الطرود الشخصية و حرية المراسلات مكفولة في الدستور؟ عادي تعوّدنا مش بيناتنا..

كل هدا بهون جنب إنه يلازمكم شعور إنه اليوم الخميس و بُكره الجمعةحتى لو الرزنامة بتقول بكره الخميس! ما في فكّة لا حد يقنعني بكره الجمعة!

أشوا ما يجي السعال الديكي و ّلا إنفلونزا الفراخ بنروح فيها رسمي

يالله باي بكره بدي أحضر يسعد صباحك و من البيت كمان!

Red Rose