تفتيش حقائب السيدات..إجراءات أمنية أم فضولية.. أم اقتحام للخصوصية؟

By: Red Rose

On:Wednesday, September 20, 2006 1:10:18 PM
In:Thoughts
Viewed: (6667) times

Currently 4.5/5 Stars.
1
2
3
4
5

Rated 4.5/5 stars (178 votes cast) Thanks for your vote!

جميعنا يجمع على احترام الإجراءات الأمنية التي اتخذت في الأردن بعد أحداث تفجيرات الفنادق، لكن هناك بعض الملاحظات التي تسترعي اهتمامي وأحتار في تصنيفها هل هي من باب الأمن أو تصنف ضمن استغلال ظروف معينة والاعتداء على حريات الآخرين …

أنا كفتاة عندما أريد الذهاب لفندق أو بنك أو مركز تجاري لا أجد أي مشكلة في التفتيش و هناك بعض الإدارات في مثل تلك المراكز أوجدت قسمين منفصلين لتفتيش السيدات و أخرى للرجال، هذه نقطة جيدة تلافيا للإحراج.

تبدأ الرحلة في العملية التفتيشية من نظرات و كشرة الحارس الأمني ونظراته المشككة بأنك قد تكون إرهابي، تقوم بالابتسام لفك عقدة الأحد عشر و تلطيف الأجواء، ثم تمر عبر الجهاز الكاشف للمعادن و إذا سارت الأمور كما يجب ولم تكن ترتدي ساعة أو تضع قروشا معدنية في جيبك فأنت ما زلت في المنطقة الخضراء ….

ثم تأتي عملية تفتيش الحقيبة (لي كفتاة):

يقوم الحارس الأمني بتمرير الجهاز عليها، بعد أن أكون قد أفرغتها من المفاتيح أو أي شيء معدني.

لم يصدر أي صوت أو أي إشارة مريبة، لكن الحارس يتوجه عادة بالقول لي:

-لو سمحتي ممكن تفتحيها؟

-أمرنا لله، متل ما بقولوا لاحق العيار لباب الدار. بنفتح الشنطة، ببلش الحارس يتطلع شو فيها، طب يا ربي شو فيها؟ هلا ما فيها معادن ولا شي ليش هالطلب ؟ ولاّ من باب الفضول؟ بلكن أنا حاطة شي كتير شخصي وما بدي حد يتطلع عليه؟ فلازم ياخد جولة ،إزا في عطر يسير يمازح و يخفف دم..

- الجادور أحلى شي شكلك مزوقة!!!

-صدفت مرة كنت رايحة عفندق في ويسترن يونيون داخل الفندق،بدي أحول مبلغ للشركة (مو إلي طبعا) كاش بصفة البنوك بأوروبا معطلة يوم الأحد، متل هيك موقف ما حبيت الحارس يفتش بالطريقة هادي..

لمن فتش الشنتة، شهق الأخ
و قالي:
ديري بالك يا مسخمة!!!

مرة تانية كان عندي درس بالمركز الأمريكي اللي (المفروض)يكونوا الحراس هناك واعيين أكتر بطريقة التعامل، كنت مروحة من الدوام والدرس ع الخمسة و أنا بلا غدا،فاشتريت شوكولاتة و هيك إشيا أتسلى فيها، نفس القصة بالتفتيش:

صحتين، شكلك جوعانة!!!

هلأ والله أنا مواطنة وجهي صبوح و متعاونة بس بهيك مواقف جد بتدايق.

موقف آخر، ما أقدرت في أمسك أعصابي بجد هالمرة..

كنت بستنى والدي يجي ياخدني من قدام الشركة اللي بشتغل فيها،قلي باجي 5 المسا، نزلت أستناه صارت الساعة خمسة و تلت و ما أجا لسه، صرت أتمشى عالرصيف، قدامي في حراس لابسين عسكري لفندق 4 نجوم، قام واحد منهم ناديني بالسبيكر بالشارع و أشرلي :

-أنتي تعالي!!

-قلتله أنا؟

-اه إنتي!!

-شو بتستني حضرتك حدا؟!!!

-والدي بدي أروح تأخر بالجية.

-يا عمي خوفتينا عم بنادونا من فوق( في شخص قدام الفندق رايح جاي روحوا شوفوا)، رعبتينا؟

- وين بتشتغلي؟

-هون!

-هويتك لو سمحتي!!

أعطيته اياها

-من وين يا مناااال إنتو... ها؟ وين ساكنة؟

-ما أظن إلك الحق تسألني !! سألتني شو بعمل وجاوبتك وين ساكنة ومن أي قبلية ولا عشيرة ولا بطيخ ما بعنييك!!!

-طبعا الرجال كأنه أخد كاسة مي باردة، طب روقيي ليش معصباه؟ها؟ (عن جد ليش أنا معصبة كنت؟) و أجى بابا وقتها وروحت وأنا مش مستوعبة غباء حراس الأمن عنا!!

هلأ لو إنه بعمل ربع واجبه بعرف إني بشتغل بالشارع، طول نهاره براقب المنطقة (أو أشياء أخرى الله أعلم)، و أنا صار لي سنة بشتغل هون المفروض يعرف إني وجه مألوف مو غريب ، هدا أولا، تانيا إنه ما بسير على ما اعتقد ينادي بنت بالشارع بهالطريقة ال zo2less ، بدك شي على عيني وعلى راسي تعا لعندي قولي لو سمحتي، بعد إزنك بدنا نسألك سؤال مو هيك بس والله مو هيك...

الفكرة إنه عملية التفتيش عنا شي جديد، أوكي الناس بدها وقت تتأقلم معه بس لازم الحراس الأمنيين يعطوهم دورات و يكسبوهم مهارات الاتصال مع الاخرين، برأيي هدا شي مهم.

بس هدي كانت فشة خلق حبيت أحكيها و شكرا كتيييييييييييييير لقويدر اللي أعطاني فرصة حلوة أشارك بهالبوست بهالبلوغ الحلو...Red Rose..tks alot Qwaider

Other Memories Documented on September 20

How to commit social suicide..
by: Qwaider.
In: 2010
Viewed: (10337) times

قهوة ابوالعبد..
by: Qwaider.
In: 2006
Viewed: (8418) times

Flyboys (2006)..
by: Qwaider.
In: 2006
Viewed: (9733) times

« قهوة ابوالعبد

Little people achieve nothing »

Memories....

#1
vagueraz
Said
On: 9/20/2006 2:00:36 PM

well , its nice post really ,, bdna nt7ammal msh security !lol

#2
Summer
Said
On: 9/20/2006 7:50:14 PM

i would like to know what the security people are looking for when they search inside women's purses...

#3
Qwaider
Said
On: 9/20/2006 8:00:49 PM

Hair Gel :D

#4
7ala
Said
On: 9/20/2006 9:51:46 PM

بتعرفي ؟ هلأ فهمت شو اللي طلبت مني مرة اني أكتب عنه :) مرة في تعليقك عندي طلبت مني اني أكتب عن موضوع و ما فهمت عليك و سألتك بس ما رجعت رديت ... هلأ بس عرفت شو اللي كان ضاغطك من هداك اليو هاهاهها ما أزكاك جد انك نهفة ... بس معك حق مرات كتير بزودوها و بتصير زناخة ما الها طعم .
و كمان شوي حيصيروا يفتشونا قبل ما ندخل أي دكانه مفعوصة !!!

أسلوبك حلو و بنصحك تعملي موقع لحالك و بلاش جميلة قويدر :-) بمزح والله قويدر وردة :/

#5
Abdullah
Said
On: 9/21/2006 4:43:41 AM

You know someone who wants to do something won't attract attention to oneself; so suspecting you has no basis what so ever. The other thing ladies have to be dealt with more respect and kindness, men can take rudeness of men and can deal with it. But women are soft creatures, in your case it was ok, it didn't scare you. With other girls it would have been a dramatic and embarrassing experience. Kan mumkin [Edited by Qwaider] min elkhoof, being under the suspicion of an armed guard.
If I were his commanding officer I would have jailed him for a week. What if you were his sister, would he like some one to do that to her? Suspicion should have sound basis, not some one that obviously waiting and going back and forth till her ride arrives.

One more thing, many of these guards are young with no education what so ever. And many will die to talk to a good-looking girl.
So they will have stupid comments as pick up lines. The state as well or even the establishment who hire an armed guard, should make sure they go through PR courses, teaching them ABC of dealing with the public, as we are not their slaves or the Gov slaves. Banatna yajib an yu7taramo, e7na beblad 3arab we3na qyam wa usool. That is one thing I respect in Arabia when I lived there for 6 months or so, betkoon mkhalif mukhalafit sair, bewqfak eshurti, beshoof ma3ak 7areem be2oulak rou7 Allah ma3ak bas ma tkhalif mara tanyeh. Ma beq3ud yebasbis 3ala meen fee esyara, we yetbayakh wyta2el damoo.
Ezoo2 Allah wela3alam bet7ibu

#6
Red Rose
Said
On: 9/21/2006 9:25:36 AM

Vagueraz:tks kullak zo2 and u r always welcome.
Summer: maybe they search cigaritte lol
7ala al 7ilweh:تزكرتي وقتها؟بس حسيتني ما وصلتلك الفكرة اللي بدي اياها بالزبط بس هي المعلم الروحي إلي بالتدوين قويدر الوردة إستضافني عنده و قال لي البيت بيتك لول شو مزوق
Abdulla:I agree with you friend, they need PR courses, but i think by the time the sitiuation would be better..tks 4 sharing us ur comment.

#7
karem
Said
On: 9/21/2006 12:09:50 PM

احيانا الناس بتحب تفسر الموضوعات زي ما بدها
باختصار
لو كان في تفتيش بنفس الطريقة اللي مش عاجبة حضرة جنابك والاهبل قويدر كان ما صار تفجيرات في فنادق عمان .
واذا حضرة جنابك مش عاجبك هالبلد وامنه شوفي البلدان حولينا وامنها وقارني وانا متاكد انه حضرتك بتتدللي ومش عاجبك العجب.
والاهبل قويدر اللي في الولايات المتحدة بيعرف التفتيش على اصوله لما يشلح ..... حتى كندرته وهو ساكت ولا نفس
بس في الاردن لا, بتصيروا زلام.

وقويدر صاير زي كنعان
اي شي ضد الاردن بنشروا
ولولا الاردن وجوازات الاردن وين كنتوا يا
افهموها

#8
Qwaider
Said
On: 9/21/2006 12:18:24 PM

كريم... انا ما رح اعيد كلامي مرة ثانية .. امّا بتحترم نفسك و بتحترم الناس اللي بتقرأ و امّا بتنقلع و ما بترجع... و مرجلاتك و عضلاتك حبيبي بتفردها على شوية ولاد صغار زيّك..
الكلام اللي فوق من حق اي شخص يحكيه ... لا هوة ضد الاردن ... و لا هوة ضد الحكومة .. لكن ضد الجهل و التفاهه والسخافة!
و لعلمك .. هذا الكلام هوة الكلام المضبوط اللي في مصلحة البلد اللي اي انسان عنده عقل و ضمير و فهم بيقدره.. كفاكم تكميم للأفواه.. خزيتونا الله يخزيكم

#9
Karem
Said
On: 9/21/2006 12:49:31 PM

مرجلاتي وعضلاتي ؟؟ على شوية صغار ؟؟ ضد الجهل و التفاهه والسخافة!؟؟و امّا بتنقلع و ما بترجع

عفوا .. التهديد في الحوارات ايضا حرية تعبير. مزبوط؟
عفوا .. واضح انك بتطبق كلامك في الحرية والديمقراطية! زيك زي غيرك بياع حكي
اتمنى انك ما تشطب كلامي
وترد باسلوب هادي حتى اقدر اوضح لزوار مدونتك رأي غير رأيك وكلام غير كلامك وسلوب غير اسلوبك
كلامي واضح
لولا التقصير في التشديدات الامنية ما كانت احداث الفنادق ولولا الامان الموجود واللي الكل بيعرفوا في الاردن ما ظل حدا في البلد
بعدين
" هذا الكلام هوة الكلام المضبوط اللي في مصلحة البلد اللي اي انسان عنده عقل و ضمير و فهم بيقدره.. كفاكم تكميم للأفواه.. خزيتونا الله يخزيكم"

مصلحة البلد في اظهارها بلد متخلفه ؟
مصلحة البلد في الاساءة لقوانينها ؟
مصلحة البلد في مهاجمة اي رأي بيعارضك ؟
مصلحة البلد في مهاجمة البلد من الخارج ؟
مين اللي بيخزي
جاوبني ؟؟؟؟؟؟؟؟؟؟

#10
Qwaider
Said
On: 9/21/2006 1:04:46 PM

انا لولا ديموقراطيتي يا سيد كريم ... ما كنت تركت تعليقك السمج لحظة وحدة.. لانه و بكل بساطة عبارة عن تهجم و قلة ادب.. و من غير داعي.. لكن بما انك تسأل.. فلا مانع من الاجابة عسى ان يكون الموضوع سوء تفاهم و يروح لحاله
شوف يا سيدي الكريم.. اولا .. القضية ليست قضية الامان و الطمأنينة في البلد. و ما في داعي نقارن حالنا بأي حد.. الحمد لله على ما نحن فيه
ثانيا .. لا احد ينكر ان الامن و الامان للمواطن امر اساسي و مهم .. و اهم من هذا حرص المملكة على تطبيق القوانين.. شيء جميل و رائع..
طبعاالكل يعرف مثلا ان الوضع في المطار على سبيل المثال حيث قامت الحكومة بتوفير سيدات فاضلات لتفتيش النساء
لكن الموضوع المذكور اعلاه هو رأي اخت فيما تتعرض له عندما يقوم رجال غرباء عنها بانتهاك حرمة الحقيبه و التي قد تحتوي على ما يسبب الاحراج لحاملتها
والاسوأ تعرض السيدات لتحرشات من نوع مشين دون وجود رقابة مما يؤدي بالبعض الي استغلال موقعه لأغراضة الدنيئة والنتيجة بالتأكيد انه لا يقوم بواجبة الموكل اليه وفي العرف العسكري، يستحق محاكمة عسكرية لعدم تنفيذه الاوامر. و انشغاله بأمور اخرى اثناء المهمة الرسمية

انا لا انقد الحكومة و لا اتهجم عليها و لا انا من المعارضة (ان وجدت معارضة في الاردن) كما ان هذا الكلام لا يخفى على احد.. كلام عام و معروف. و ليس اسرار عسكرية او اسرار دولة!
كما ان سجل حقوق الانسان في حق الاردن يستحق النظر فيه و يحتوي على ما هو اشد و افظع.. ولكن لم يتطرّق احد لهذا الموضع
الآن... ما اعتراضك على كل القضية؟

#11
Karem
Said
On: 9/21/2006 1:28:17 PM

وين قلة الادب يا قويدر ؟؟؟
الكل يعلم عن تفتيش المطارات الامريكية وخلع الاحذية !!
وين قلة الادب ؟
على كل حال اذا كان الموضوع موضوع تحرش
بامكان اي شخص تقديم شكوى بحق اي مسيء وصدقني رح تتفاجأ من الاجراء المتخذ بحق اي واحد يتحرش او بتصرف تصرف غير لائق.
لازم تتغير الفكرة الراسخة عند الناس انه كل شي بيخوف
واذا احنا سكتنا عن واحد تصرف بشكل غير لائق . هذا هو السبب اللي بيخلي الناس تفكر انه الكل هيك وبيخلي اشخاص تكتب كلام وتنشر معلومات ممكن انها صادقة بس ما بيجوز نعمم على الكل او تنشرها بالشكل المنشور فيه
لازم يكون في وعي في القوانيين حتى الاخت ما ترد على اي واحد حاب يفتشها
اكيد في بطاقة معلقة للحارس فيها اسمه زاسم الشركة ووظيفته
اعطيني رأيك في اظهار مثل هيك مشاكل ونحلها بعد ما نعرضها بشكل ملائم
وعندي الكثير من الظواهر المحتاجه للتعديل والتصحيح
بس افهمني صح
وعذرا مرة اخرى على ردة فعلي المتسرعة في الرد على المقال
وصفحة جديدة يا سيد قويدر

#12
Qwaider
Said
On: 9/21/2006 1:32:56 PM

اهلا وسهلا يا سيد كريم... صفحة جديدة .. و من غير زعل...
الله يلعن الشيطان بس
شرفنا على فنجان قهوة :)

#13
Summer
Said
On: 9/21/2006 1:42:12 PM

Guys, glad things worked out for the best...happy that both of you graciously cleared things up.
:)

#14
Karem
Said
On: 9/21/2006 2:09:54 PM

شكرا على القهوة
ومش بوجهك بحكي
انا كل يوم تقريبا لازم امر على مدونتك واقرأ مواضيعها
بس اليوم يمكن مزاجي السيء من الصبح خلاني اتدخل في هذا الموضوع

الله يستر في رمضان شو رح اعمل
بمزح

كل عام والجميع بخير

ما بدي حدا يظل زعلان مني

اخوكم كريم

#15
Red Rose
Said
On: 9/21/2006 2:21:19 PM

أهلا وسهلا أخ كريم
بس بدي أوضح نقطة لأني أنا كتبت البوست ،إزا انتبهت بالبداية قلت (جميعنا نجمع على احترام الاجراءات الأمنية)أنا لمن كتبت هدا البوست ما كان قصدي أتهجم على حدن إطلاقا،وحراس الامن بالمولات والبنوك والمجمعات التجارية موظفين خاصين،فما كنت متقصدة حدن معين متل مافهمت.
أكيد كل الاحترام والتقدير لرجال الأمن وكلنا بنقدر أكيد نعمة الأمن اللي ببلدنا،أنا حكيت عن انتقاد بسيط للطريقة والاسلوب لحادثة إطلاقا لا تعمم أبدا و إزا بنحكي شي بكون هدفنا ليس الانتقاد لمجرد الانتقاد الفارغ بل الوصول للأفضل،يا ريت ناخد الموضوع من هالزاوية،شكرا عرأيك و أهلا دايما بكل الاراء اللي ما بتفسد للود قضية
أهلا وسهلا مرة تانية

#16
Karem
Said
On: 9/21/2006 2:49:23 PM

Red Rose
يا سيدتي الكريمة انا بحب احكي لك شغله مهمة انا لا ولن وابدا لا ارضى ان يتم تفتيش اختي او زوجتي او امي بهذا الشكل

اذا انا لا ارضى لك او لغيرك ذلك

بس طرح القضية بالشكل اللى انطرح فيه مثل العنوان

تفتيش حقائب السيدات..إجراءات أمنية أم فضولية.. أم اقتحام للخصوصية؟

وتعميم بعض الاخطاء هو مشكلة اخرى
على كل حال
ما بعرف اذا اعتذاري الشخصي عن هيك تصرفات في الاردن ,البلد اللى بحبها رغم كل شي فيها صح او غلط

كل الحق اذا على اللي المخربين اللي كانو سبب مثل هيك اجراءات

Red Rose
شكرا على التوضيح

#17
Red Rose
Said
On: 9/21/2006 2:59:23 PM

إزا دققت بالمقال بتلاحظ إنو الاعتراض أبدا مو على تفتيش الحقيبة بالشكل العادي بالعكس أنا من أول المتفهمين لهيك إجراءات وكنت وما زلت من أكتر المتعاونين معها،أنا نوهت إنه ما في مشكلة في تمرير الجهاز الكاشف للمعادن على الحقيبة شي طبيعي،بس كان الانتقاد على تفتيشها بشكل محرج (من قبل بعض الحراس)بطريقة محرجة توحي بالتلصص أكتر من شي تاني.بس هدا كان القصد من طرح القضية كلها،شكرا لتفهمك وبجوز أنا طريقتي بالتعبير هيك في بعض السخرية اللاذعة بس مو كل الناس بتكتب بنفس الطريقة أو بتوصل فكرتها بشكل مباشر.

أهلاوسهلا مرة تانية :)

#18
dandoon
Said
On: 9/23/2006 10:44:40 PM

hi dear red rose,
ur article z wonderful and understandable and plz dnt worry about kareem he just want 2 attack maybe he z free and want 2 have fun.. mawdo3ek be3a2ed w continue in that way plz w ma tehtame b 7ad kol wa7ad fehmo 3 2do she bdk t3male mish kol el 3alam btefham mn awal marra! w nfsi ashoof mawdoo3 la had ele esmo kareem 3amle fiha fahman...ya 7aram keef bnfaker

#19
Karem
Said
On: 9/24/2006 10:44:59 AM

Hi dandoon والجميع
صباح الخير
ورمضان كريم
ما رح ارد على كلامك واتهامك الى باني بهاجم علشان اتسلى
او لاني فاضي والله مو فاضي اولا بعدين انا فكرت انه الموضوع انتهى ليش
راجعة تعملي مشاكل

بصراحة عجبتني الجملة
had ele esmo kareem 3amle fiha fahman
طبعا الترجمة :
هاد الي اسمه كريم عامل فيها فهمان

مين قال اني فهمان لما اقرأ عربي مكتوب باحرف انجليزية
لا والله مو فهمان ؟؟؟

شكرا كثير على الكلام الرائع dandoon

hade ele esmha dandoon 3amle fiha mashakel

باي